Аҟәа. Нанҳәамза 14, 2023 шықәса. Аԥсныпресс. Нанҳәамза 14 рзы Аԥсны Жәлар Реизара – Апарламент Аиҳабы Ашәба Лаша Аԥсны Аџьынџьтәылатә еибашьра ианалагаз аахыс 31 шықәса аҵра инамаданы Аԥсны жәлар рахь ааԥхьара ҟаиҵеит.
Ааԥхьара атекст аҟны иҳәоуп:
«Акыр иаԥсоу 1992–1993 шш. Аԥсны Аџьынџьтәылатә еибашьра аветеранцәа!
Ҳаҭыр зқәу ҳауаажәлар!
1992 шықәса нанҳәамза 14 рзы Аԥсны жәлар ҳтәыла ижьышо иақәлаз агрессор иҿагылеит, ибзиангьы ирдыруан хьаҵра шыҟамлоз, ҳ-Аԥсадгьыл Аԥсны алахьынҵа рнапы ишаныз.
Аибашьра иаанагаз агәырҩа, ахьаа еиҳагьы еиднакылеит милаҭрацәала еилоу ҳреспублика ауааԥсыра зегьы, ари аидгыларала иагьалыршахеит ихьыԥшым рҳәынҭқарраҟны анхара-анҵыразы ирымаз азин ахьчара.
Ҳаԥсадгьыл ахьчаҩцәа рыԥсы аҵкыс рыԥсадгьыл еиӷьашьаны, ирымаз зегь реиҳа хәы змаз – рыԥсҭазаара Рыԥсадгьыл ахақәиҭра иақәырҵеит. Аԥсны жәлар рхақәиҭратә қәԥараҟны иргаз Аиааира иахҭынҵоу рацәоуп.
Хашҭра рықәӡам ҳ-Аԥсадгьыл Аԥсны зхы ақәызҵаз зегьы!
Иахьа ҳара зегьы урҭ ргәалашәара аҿаԥхьа ихадароу уснагӡатәны иаҳзықәгылоуп Аԥсуа ҳәынҭқарра аргылареи, арӷәӷәареи.».
2023 шықәса, нанҳәамза 14
Аԥсны Жәлар Реизара–Апарламент Аиҳабы Ашәба Л.